بتعيش بفرنسا ؟ تعال ابيك بكلمة راس (Part one)
- saudinouf
- Jun 15, 2017
- 2 min read
قررت واخيراً اكتب لكم خلاصة تجربتي ..واشرح بعض
الأمور اللي مهم يعرفها كل شخص قبل يسافر .. وتكفخه الدنيا هناك
سواءً كنت رايح تدرس ، تشتغل ..او تعالج اوتستقر هناك لمده طويله فيه اشياء مهم تفهمها قبل تروح
١- خذ معك كل اوراقك ( اذا كنت طالب) حتى شهادة الثانوي خذها معك فيه جامعات بتطلبها منك للماجستير !تخيل
٢-السكن
هذا عاد اهم موضوع واكثر موضوع معقّد هناك طيب ليش؟
لإن بفرنسا ماتقدر تستأجر الا ومعك ضمانات للمؤجر
يايكون معك شهادة ضمان بنكيه ( وفيها اجار سنه يجمدونه بحساب بنكي ويعطونك عليه ورقة! وطبعا هالشي مستحيل وصعب على بعض الطلبه ) او يكفلك موظف فرنسي ويضمنك امام المؤجر .. وهذا الخيار اصعب من اللي قبله ...
طيب وش السواة؟
فيه اكثر من خيار
يا انك تنشب للملحقيه لين يطلعون لك ضمان سكن وتسوي فلم لأن هم مايعطون ( كانوا سابقاً والغوه) عشان مايدخلون في قضايا مع اي مالك استاجر منه احد ومادفع له فقرروا انهم يكنسلون الموضوع كامل وابلش انت دور
او انك تدور بيت تستأجره من المالك مباشره وفيه مواقع على الشبكه وتتفق مع صاحب البيت وتفهمه وضعك ( قد يقبل و٨٠٪ يرفض) عاد انت وحظك!
مثل airbnb / pap.com/ homeaway.com
او عاد تحلها مع اصحاب المكاتب العرب ممكن يلقون لك حل
عموما هذا اكثر موضوع معقد ويطفش ويحتاج وقت تدور وترتب له .. فاحرص عليه
(CAF)
الكاف مؤسسه حكومية تدعم الطلبه الاجانب وتساعدهم في دفع ايجاراتهم السكنيه وتدفع معكم نسبة من ايجار السكن تاخذ موعد معهم وتاخذ الأوراق الي بيطلبونها منك
وتروح تراجع
وهذا موقعهم
http://www.caf.fr
٣- السياره والمواصلات
اذا كنت بتعيش بباريس راح تسبب لك السياره صداع اكثر من منفعتها ليش؟
لان المواصلات العامه جيده هناك وعندك مع السياره مشكلة المواقف .. العاصمه فيها ازمة مواقف وبتقعد ساعه تدور موقف /سعر المواقف الخصوصيه المدفوعه يعتبر مرتفع شوي/ ارتفاع سعر البنزين/ سواقتهم هناك لك
ولكن الخيار لك .. تاخذ سياره او ما تاخذ
٤-لازم قبل تروح تاخذ فكره عن الجامعات وتفهم النظام الدراسي هناك ليش؟
لانه يختلف تماما عن النظام الأمريكي / البريطاني الي تعودنا عليه
وحتى مسميات الدرجات العلميه فبه اختلاف
البكالوريا/ ثانويه عامه
ليسانس ٣ سنوات مدته / بكالوريس
ماستغ سنتين مدته/ ماستر
دكتوراه/ دكتوراه
٥- البنوك وما ادراك مالبنوك
عشان تفتح حساب هناك تحتاج خطابين من الملحقيه
- تعريف
-اعفاء ضريبي
التعريف كلنا عارفينه بس الاعفاء وشو اذا كنت مبتعث والسعوديه مرسلتك دخلك هناك مُعفى من ضريبة الدخل فالبنك مايستقطع منك شي لفرنسا لإنك مبتعث !
تاخذ هالورقتين ومعك جوازك وكل اثباتاتك ومن ضمن هالاثباتات ( عنوان السكن ) البنك ماراح يتواصل معك الا عن طريق البريد فلازم لازم لازم يكون عندك صندوق بريد ولا بتتعب كثير وماراح تعيش عيشه مريحه في فرنسا لانهم معتمدين عليه اعتماد كلي
تروح اي بنك تحب ويفضل يكون قريب من بيتك لان بفرنسا ماتروح اي فرع يخدمك نظامهم مختلف
كل عميل يروح لفرعه يخدمه وكل فرع يعتبر وحده مستقله
( مو نفس النظام عندنا (تطب بأي فرع ويساعدك لا !! الوضع هناك مختلف تماما
٤- التأمين الطبي
هذا ابسط شغله بتسويها بيجيك على ايميلك من الملحقيه رابط تسجل فيه بيانات لشركة التأمين تحط عنوانك ويرسلون لك على البريد كرت التأمين حقك
البقيه انتظروها في الپوست الجاي ..
نوف
Comments